Ang Manidé ay ang wika sinasalita ng mga Kabíhug—isang grupo ng mga Agtâ na naninirahan sa Camarines Norte, partikular sa barangay Cabatuhan, Malaya, at Bagong Silang sa bayan ng Labo; Barangay San Lorenzo sa bayan ng Santa Elena; Barangay San Jose, Osmeña, at Tamisan sa bayan ng Jose Panganiban; bayan ng Paracale; at sa barangay Alayao sa bayan ng Capalonga. Kilalá rin silá sa mga tagalabas sa tawag na Abíyan.

          Matatagpuan sa mga bayan ng Santa Elena at Labo, Camarines Norte ang pinakamalaking bílang ng mga gumagamit ng wikang Manidé. Bukod sa kanilang sariling wika, nakauunawa at nakapagsasalita rin ang mga Kabíhug ng Tagálog at Bíkol—mga wikang sinasalita sa mga karatig-pook at sa kalakhang Bicol.