Ang Búhid Mangyán ay ang wika ng mga Búhid Mangyán na naninirahan sa mga bayan ng Bansud at Bongabong, ilang bahagi ng Roxas, at ilang bahagi ng Mansalay sa Oriental Mindoro; at sa mga bayan ng San Jose at Rizal sa Occidental Mindoro. Kilalá rin ang mga Búhid Mangyán sa tawag na Búhid, Búkid, o Búkil. 

          Maliban sa kanilang katutubong wika, matatas din sa wikang Tagálog ang mga Búhid Mangyán dahil ito ang rehiyonal na wika sa lugar. Ang mga nakapag-aaral ay marunong din ng wikang Filipíno at Inglés na mga wikang panturo sa paaralan. Ayon sa mga grupo, pinakamalapit sa kanilang wika ang Hanunóo Mangyán dahil sa lahat ng wikang Mangyán ay ito ang pinakanauunawaan nilá.